تاجیکستان 80 زندانی افغان را تحویل کابل می دهد - وبلاگ به آبادی

به گزارش وبلاگ به آبادی، کابل- خبرنگاران- رییس جمهور تاجیکستان می گوید به زودی 80 نفر از زندانیان افغان را که در این کشور زندانی هستند، به افغانستان انتقال خواهند داد.

به گزارش روز آدینه وبلاگ به آبادی به نقل از اطلاعیه وزارت خارجه افغانستان ، امامعلی رحمان این سخنان را در دیدار با صلاح الدین ربانی، سرپرست وزارت امور خارجه افغانستان، مطرح نموده است.

وزارت امور خارجه افغانستان روز آدینه گفته است که درخواست استرداد 80 زندانی افغانستان از تاجیکستان از سوی صلاح الدین ربانی، سرپرست این وزارت، مطرح و از سوی رییس جمهور تاجیکستان پذیرفته شده است.

رحمان به سرپرست وزارت امور خارجه افغانستان اطمینان داده است که 80 نفر از زندانیان افغان به زودی به افغانستان منتقل خواهند شد.

هرچند تاکنون روشن نیست که چه تعداد از شهروندان افغان در تاجیکستان زندانی اند، اما پیش از این نیز شماری از زندانیان افغان از تاجیکستان به افغانستان انتقال یافتند.

وزارت امور خارجه افغانستان همچنین گفته است که دو طرف در این دیدار روی موضوعات امنیتی، مالی و پروژه های توسعه ای بحث نموده اند.

بر اساس این گزارش، رییس جمهور تاجیکستان همچنین در بخش همکاری های مالی و پروژه های توسعه ای گفته است که کار بند راغون در یک سال آینده تکمیل می گردد و افغانستان از برق این بند بهره مند خواهد شد.

بند راغون از پروژه های بزرگ مالی تاجیکستان است. انتظار می رود تاجیکستان از این نیروگاه برق آبی، به افغانستان و پاکستان برق صادر کند.

**آساق**1518